Einstakur laugardagur og "mans cold"

Um hádegisbilið hélt ég af stað í Höfuðborgina - alein með bros á vör. 

Tilgangur ferðar :  Eyða peningum, kaupa föt og skó, fara í nudd og á snyrtistofu.

Snyrtistofan var frábær - nuddið var einfaldlega svo frábært að það eru ekki til nógu hástemmd lýsingarorð yfir það.  Tími til að versla og skoða í búðir var hins vegar ekki nægur og ég hafði ekki nema einar buxur upp úr krafsinu.   Merkilegt að þegar maður á enga peninga þá er allt fljótandi af fatnaði og skóm sem manni langar í en þegar maður virkilega á peninga og ÆTLAR að kaupa sér föt og skó þá eru bara lítil og ljót föt í búðunum. 

Kom heim og borðaði dýrindis svínalund að hætti bóndans ( sem ekki bara eldaði heldur gekk frá eftir matinn líka )

Í gærkvöldi bankaði hér ungur og myndarlegur maður á dyr - stoppaði stutt en fór á brott með alla naggrísina í bílskúrnum - samtals sjö stykki.   Nú og í framtíðinni er þetta naggrísalaust heimili.  Ég er mjög sátt við að vera laus við kvikindin en samt, smá söknuður.  Skrítið. 

Þar sem hér er hvorki snjór né hálka ( rigning og 7 stiga hiti um kvöldmatarleytið ) þá hef ég ákveðið að fá mér hjólarúnt á morgun.  Hvort sem þeir bræður ætla að koma með mér eða ekki !

Kæru bræður og mágkonur, bæði hafnfirsk og norsk.  Afmælisgjöfin var vel nýtt í dag og ég naut þess í botn.  Takk fyrir mig. 

Norski bróðir er sárlasinn - með mans cold.

 

Fyrsti vinnu og skóladagurinn.

Það hafðist  að koma bræðrum á fætur í morgun en það var dálítið verk !  Erfitt að vekja syfjaða stráka sem fannst afskaplega erfitt að vakna.   Bræðrum fannst afskaplega kalt inni og borðuðu hafragrautinn kappklæddir í hettupeysum með rennt upp í háls. ( og annar með hettuna á höfðinu ) 

Mamma var líka frekar syfjuð - fór seint að sofa og þar sem einn strákur gerði innrás í hjónarúmið í nótt varð ekki mikið um svefnfrið eftir það.  Kosturinn við að eiga stór börn er að þau eiga stór rúm og ég endaði á því að skilja stráksa eftir í mínu rúmi og svaf í hans rúmi í staðinn.  Svaf ágætlega eftir það.

Nóg að gera í vinnunni - fyrir bókara og aðra pappírspésa þýða áramót alltaf mikla vinnu.  Svo var verið að mála skrifstofuna yfir jólin og fullt af möppum og dótaríi sem á eftir að ganga frá.  En það er bara gaman.

"Lenti" í leiðinda atviki áðan.  Einmanna ístoppur öskraði á mig úr fyrstihólfinu og hreinlega grátbað mig um að éta sig með græðgi sem fyrst !  Auðvitað gerði ég það.  Nú er mér illt í maganum og með slæma samvisku enda búin að strika alla óhollustu út af matseðlinum.

Skal muna að taka boxið með gulrótunum með í vinnuna á morgun !

 

Back to reality

• Nestisboxin tilbúin í ísskápnum
• Klárt fyrir að elda hafragraut í fyrramálið
• Skólatöskur komnar fram aftur

og búið að stilla vekjaraklukkur.

Ég held að hinu ljúfa lífi í jólafríi sé aaaaaaaalveg að verða lokið !

Nýtt blogg - nýtt ár

Bloggandinn hefur eytt of miklum tíma á fésbókinni undanfarið  - því miður.  Þótt fésbókin sé skemmtileg í hófi þá verður ekki af henni skafið að hún er helv....... tímaþjófur. 

Nýtt ár rann upp hér á heimilinu eins og annars staðar í veröldinni.  Við vorum stödd hjá afa og ömmu í rauða húsinu þegar nýja árið rann upp.  Bræður voru þó orðnir ósköp framlágir og um fjörutíu mínútum eftir nýja árið rann upp vorum við komin heim og bræður komnir undir sæng.

Jól og jólafrí hefur verið með allra letilegasta móti.  Við vorum svo lukkuleg við hjónin að vera bæði í fríi á þorláksmessu og bóndinn var að mestu í fríi milli jóla og nýárs.  Ekkert frí hjá mér enda bæði verið að mála skrifstofuna og svo er að renna upp anna og stress tími í vinnunni, ársuppgjör og allt sem því fylgir.   Bræður hafa verið í fríi síðan 18 des en það er ekki fyrr en á nýja árinu sem þeir hafa sofið lengur en til 8,30 á morgnanna.  Jólasveinninn hélt þeim bræðrum við efnið fyrir jól og þeir voru iðulega komnir á fætur fyrir kl 7 á morgnanna til að kíkja í skóinn.

Annar sonurinn var svo spenntur yfir þessu að hann vaknaði iðulega um miðja nótt  til að skoða í skóinn.  Ef sveinki hafði skilið eitthvað matarkyns eftir þá borðaði hann það strax og lagðist svo til svefns aftur. 

Það sér á sófaáklæðum (slit) eftir þessi jól og mesta furða að túbusjónvarpið sé ekki búið að bræða úr sér.  Það er sem sagt búið að liggja fyrir og horfa á sjónvarpið eða dvd stóran hluta af fríinu.  Svo erum við gamla settið alveg steinhissa á að vera með verki í  skrokknum.  Eins og sé ekki nóg að vera með meltingartruflanir og magaverki af ofáti............

Skítakuldi úti  þó veðrið sé stillt og fyrirsjáanlegt að sófinn slitni aðeins meira í dag en í gær.

Við fórum í bíó í gær og ákváðum að fara í Smárabíó.  Sáum að það var ekki kreppa í Smáralindinni en það var nánast hvert einasta bílastæði fullt.  Útsölur byrjaðar af fullu trukki og kaupóðir íslendingar með brjálæðisglampa í augum þrömmuðu um gangana.   Ég hefði örugglega slegist í hópinn ef ekki hefði verið fyrir viðhengin þrjú - karlinn og börnin. 

Ég mæli alveg með Alvin og íkornunum 2 !

 

P.S  Setti mér engin sérstök áramótaheit en fullt af markmiðum.  Þau eru mörg hver heilsufarstengd og snúa að sjálfri mér.

P. S nr tvö - Ætla ekki að fjalla um Icesave - það eru hvort eð er nógu margir búnir að því.

P.S nr þrjú :  Mér fannst áramótaskaupið mjög gott.  Langt síðan ég hef hlegið svona mikið að skaupinu.  Lokaatriðið er auðvitað bara snilld.

 

Einn léttur - bara fyrir fullorðna

 

Drukkinn maður gengur inn á bar þar sem mótorhjólagengi heldur til, sest við barinn og pantar sjúss. Hann lítur í kring um sig og sér þrjá mótorhjólatöffara sitjandi við borð. Hann stendur upp, staulast að borðinu, hallar sér fram, horfist í augu við stærsta, illvígasta mótorhjólatöffarann og segir: "Ég kom við hjá ömmu þinni í dag og sá hana á ganginum kviknakta. Maður minn, hún er stykki sem stingandi er í!”

Mótorhjólatöffarinn horfir á hann og segir ekki orð. Félagar hans eru undrandi, því hann er hörkunagli og er vanur, að efna til slagsmála út af litlu tilefni. Sá fulli hallar sér yfir borðið aftur og segir: "Ég fékk það hjá ömmu þinni og hún er góð í rúminu, sú besta sem ég hef nokkurn tíman prófað!"

Félagar mótorhjólatöffarans eru að verða alveg brjálaðir úr reiði, en mótorhjólatöffarinn segir ekki orð. Sá fulli hallar sér yfir borðið einu sinni enn og segir, "Ég skal segja þér svolítið annað, drengur minn, ömmu þinni fannst það helvíti gott!" Þá stendur mótorhjólatöffarinn upp, tekur um axlirnar á þeim fulla, horfir í augun á honum og segir……….”Afi,……….Farðu heim, þú ert fullur”

Jólasveinar

Bræður halda áfram uppteknum hætti að minna mömmu á að fara snemma að sofa.  Móðirin hélt til Reykjavíkur á laugardagskvöld í afmæli og bræður höfðu af því nokkrar áhyggjur hversu seint/snemma mamma kæmi sér heim.  Allt gekk þetta nú upp, mamma skilaði sér heim á skikkanlegum tíma og jólasveinninn laumaði glaðningi í einn kuldaskó og einn takkaskó. 

Annar sonur spurði í kvöld hvort við gætum ekki skilið þvöru eftir í glugganum fyrir Þvörusleiki ?  Hann var nú samt ekki alveg viss um hvað þvara væri en tók vel í hugmynd bróður síns að gefa sveinka smákökur og mjólk.  " hann frændi gaf jólasveininum mjólk og kökur og fékk í staðinn þrjá pakka af fótboltamyndum "   Ég var nú ekki alveg að kaupa það að sveinki þægi mútur - hann væri sko löngu búinn að ákveða hvað börnin fengju í skóinn þegar hann kæmi og mjólk og smákökur breyttu engu um það.  Bræður keyptu þau rök en vilja samt sem áður gefa sveinka mjólk og kökur.  Heppilegt að ég sé að baka súkkulaðibitakökur núna !

Það er 14 desember í dag og um klukkan 7 í kvöld var 9-10 stiga hiti.  Bræður fóru í klippingu til hárgreiðslufrænku i kvöld - við fórum hjólandi.

Ætla að taka súkkulaðibitakökurnar úr ofninum og horfa á endursýningu á spaugstofunni.

 

 

Snemma að sofa ?

" mamma svo átt þú að fara snemma að sofa í kvöld svo þú eyðileggir ekki fyrir okkur "  sagði strákur í skipunartón eftir kvöldmat.  Mamma hristi hausinn dálítið skilningssljó en fattaði svo hvað strákur meinti.  " ég á sem sagt að vera farin að sofa þegar jólasveinninn kemur því ef ég er vakandi þá kemur hann ekki neitt og þið fáið ekkert í skóinn ?"  Já, sagði strákur, greinilega ánægður með að mamma skyldi vera með allt á hreinu.

Jólasveinninn kemur nefnilega til byggða í nótt og það má setja skóinn upp í glugga í dag.  Bræður gerðu það í morgun áður en þeir fóru í skólann,  svona til að vera alveg öruggir.  Þeir ráku á eftir mér í kvöld með að tannbursta sig og svoleiðis og fóru snemma að sofa.   Ef ég þekki mína drengi rétt þá verða þeir vaknaðir sérlega snemma í fyrramálið.

Bræður bíða spenntir - bara sex dagar í jólafrí. 

Síðan ég bloggaði síðast hef ég :

• þvegið einn stráka gsm síma í þvottavél -  komst að því að hann var ekki vatnsheldur.
• Keypt nýjan bíl
• Haldið upp á fertugsafmælið mitt
• eytt of miklum tíma á fésbókinni
• Farið á allavega einn óþægðarfund í skólanum
• rekist á skrýtin leitarorð í tölvunni sbr. "sexi" og "sexý"
• Látið virkja netvarann
• Eignast fleiri naggrísi

Fór út að borða með vinnufélögum í gær - get fullvissað ykkur um að maturinn á sjávarkjallaranum er guðdómlegur.  Hvílík nautn fyrir bragðlaukana.

Ætla að reyna að baka eitthvað á morgun.

kv húsmóðirin sem fer vonandi að eyða meiri tíma í að blogga og minni tíma á fésbókinni 

 

Hvernig í ósköpunum fór fólk að með veik börn heima hér áður fyrr ?

Hef svo iðulega hugsað út í þetta þegar veikindi hafa stungið sér niður hérna og sjónvarpið/vídeó/dvd gengur "non stop".    Geðheilsa mín, og sjúklingana væri  komin langt út í buskann á fyrsta degi veikinda.  En börnin hafa sennilega verið mun duglegri að hafa ofan fyrir sér sjálf  - eitthvað sem allt of mörg nútímabörn kunna og geta ekki. 

SÁ er búinn að vera heima í tvo daga - með hita og flensu.  Ekki þessa sem er kennd við svín, að ég held allavega.  Honum líður aðeins betur og amma í rauðahúsinu ætlar að tala að sér sjúklingapössun á morgun svo mamma komist í vinnuna.

Fyrri part vikunnar var hinn sonurinn slappur og sljór.  Hann tók síðustu helgi og vetrarfríið fyrri part vikunnar í að liggja eins og skata( fyrir framan sjónvarpið, nema hvað ) með hitavellu en var orðinn nógu sprækur til að fara aftur í skólann í gær.  Honum fannst frekar súrt samt að bróðir hans "fengi" að vera heima en hann yrði að fara í skólann.

Pabbi átti afmæli i gær - og vegna þrýstings frá fjölskyldumeðlimi varð ég að gjöra svo vel að snara fram eins og einni köku.   Ekki gat ég boðið bóndanum upp á góða máltíð þar sem hann var að fara skólann og hafði ekki tíma til að borða.  Lítið hátíðlegt við þennan afmælisdaginn.

Afi á Djúpavogi ( sem keypti sér mótorhjól i sumar ) meiddi sig á hendinni um daginn og var frá vinnu í nokkra dag.   Ég fór að segja JA að afi hefði meitt sig í hendinni.  " Datt hann á mótorhjólinu ?" spurði strákur.    Það var alveg viðbúið að það yrðu einhver slys þegar afar tækju upp á því að keyra um má mótorhjólum á gamals aldri. 

SÁ  ætlar sér að læra að binda slaufur og reima skóna sína.  Hann notar hvert tækifæri til að æfa sig og þar sem viljinn er töluvert meiri en stirðu puttarnir hans ráða við þá eru það ansi margir hnútarnir sem búið er að binda og mamma og pabbi hafa þurft að leysa. 

Ætla að vera lásí húsmóðir og elda unna kjötvöru og þurrvöru.  Sveitabjúgu frá Kjarnafæði og kartöflumús úr pakka verður á boðstólum í kvöld !

 

Er ekki kominn tími til að

setja upp einhvers konar síu eða netvara þegar nýjustu leitarorðin á jútúb eru "sexy" eða "sexi" ?  Norski bróðir var með ægilega fína grein og fullt af tenglum á blogginu sínu um daginn, eins gott að fara að leita.

Er búin að gera við og bæta 5 buxur af bræðrum í dag, auk þess að merkja tvenn pör af fingravettlingum og nýju úlpurnar sem bræður fengu í afmælisgjöf.  Er bara nokkuð ánægð með mig.  Stefni á að sauma og setja upp ný gluggatjöld fyrir baðgluggann á morgun.  Verð ægilega hagsýn í kreppunni og sauma þau upp úr gömlum eldhúsgardínum.

Vildi að ég ætti koníak  - eða Jameson, mig langar í heitan áfengan kaffidrykk.  En hvorugt er á boðstólum svo ég læt bara pepsi max duga.

Best að athuga hvaða sjónvarpsrás er minnst leiðinleg

afmælisveisla, bíóferð, tannúrdráttur og barnamatur

Bræður eru orðnir 8 ára - ótrúlegt að það skuli vera orðin átta ár síðan við komum heim með í litlu íbúðina okkar í Reykjavík með tvo pínulitla stráka.  Það var fallegur, sólríkur og dálítið kaldur októberdagur þegar við þrömmuðum með tvo ungbarnastóla upp á þriðja hæð, klæddum þá úr útifötunum og settum þá í rúmið ( þeir voru í sama rúminu fyrstu 3 mánuðina )  settumst fram í eldhús og horfðum á hvort annað með spurnarsvip og mér fannst við bæði hugsa það sama " og hvað svo " ?

Og síðan eru liðin átta ár - vá !  Bræður héldu afmælisveislu 9 okt og buðu 20 strákum í veislu á pizzastað þar sem þeir snæddu pizzu, franskar, kökur og nammi.  Léku sér og ærsluðust auk þess að hlusta á Michael Jackson.  Bræður voru jafn ánægðir með daginn eins og foreldrarnir voru uppgefnir.  2 klukkutímar með 20 orkumikla og óþæga átta ára stráka  er ágætis skammtur.

á Sunnudeginum, afmælisdeginum sjálfum var svo búið að ákveða að fara í bíó og sjá Algjör Sveppi og leitin að Villa.  Bræður skemmtu sér vel en foreldrarnir voru kannski ekki alveg eins heillaðir.  Svo var endað á Kentökkí  - að ósk bræðra og allir voru sáttir.

Þó svo bræður hafi hvorki fengið BMX hjól, leikjatölvur né fartölvur í afmælisgjöf þá voru þeir ánægðir með það sem þeir fengu - markmannshanska, íþróttasokka, geislasverð, úlpur og slatta af peningum.  Eru búnir að kaupa sér sitthvort tölvuleikinn og fá að kaupa eitthvað meira en svo eiga þeir að setja afganginn í banka.  Nú skal safnað upp í BMX hjól sem kostuðu allavega 50 þúsund kr stykkið í sumar, hver veit hvað þau koma til með að kosta næsta sumar

Á mánudagsmorgni lá svo leið okkar hjóna aftur á höfuðborgarsvæðið - ekki nein skemmtiferð samt, bóndinn átti bókaðaðan tíma hjá tannlækni sem sérhæfir sig í að skera tennur úr fólki.  Tveimur tímum og tveimur tönnum seinna höldum við heim á leið aftur.  Bóndinn ekki mjög frýnilegur á svipinn, bólginn í andliti með blóðugar grisjur í munninum auk þess sem göngulagið var ekki mjög stöðugt.  En svoleiðist verða áhrifin af deyfilyfja- og  róandi lyfja kokkteil í bland.    Fyrsta daginn gat bóndinn engu komið niður nema AB mjólk.  Næsta dag var AB mjólk líka á matseðlinum en um kvöldið fékk hann soðna sæta kartöflu sem var búið að stappa og smávegis af þurrsteiktu hakki saman við.  Daginn þar á eftir var veisla - eggjahræra í hádegismat og svo heimatilbúin kartöflumús með stöppuðu soðnu grænmeti og maukaðri kjúklingabringu saman við.   Bóndinn borðaði barnamatinn með bestu lyst. 

Í gærkvöldi borðaði hann svo pylsur og kartöflumús með bestu lyst - enda ekki spurning að honum líður mun betur.  Hann nýtur þess væntanlega einhverja daga í viðbót en það er ekkert langt í næstu tannlæknaheimsókn og þá verða fleiri tennur fjarlægðar.  Sem betur fer er til starfstétt sem heitir tannsmiðir og einn af þeim kemur víst til með að smíða nýjar tennur í staðinn fyrir þær sem hverfa. 

Ég ætla í sláturgerð næsta fimmtudagskvöld - með vinnufélögum.  Ég mætti ekki í fyrra, en minning um sláturgerð og vambasaum frá matreiðslunámskeiði í Grunnskóla situr ennþá í mér og ég fæ ógleðistilfinningu við tilhugsunina.  Nú ætla ég hins vegar að láta mig hafa það, enda tuttugu og eitthvað ár síðan og tími til kominn að vinna sigur á þessu.  Svo fær maður líka hluta af afrakstrinum með sér  heim  og fellur vel í kramið hjá hagsýnu húsmóðurinni

Vetrarfrí í skólanum á mánudag og þriðjudag - ætla að hlekkja bræður heima fyrir hádegi meðan ég fer í vinnuna en leysa þá svo um hádegisbil.  Fæ kannski lánaðar dvd myndir svo þeim leiðist ekki eins mikið.

Ætla að draga fram saumavélina á eftir og gera við buxur af bræðrum - einar 4-5 stk buxur sem þarfnast viðgerðar.  En ætla aðeins út að hjóla fyrst.